Албански Грци нападнати од националисти по фудбалскиот натпревар Србија-Албанија

Припадници на етничкото грчко малцинство во село Дервичани во реонот на градот Ѓирокастро во јужна Албанија, доцна синоќа биле нападнати од албански националисти, објави грчкиот весник „Катимерини“.

Група од околу 100 лица, кои носеле албански знамиња и транспаренти со националистички пораки, со автомобили пристигнале во селото, што се наоѓа во непосредна близина на границата со Грција, и кршеле излози на продавници и паркирани автомобили, сè додека не биле спречени од полицијата.

Насилството во Дервичани избувнало неколку часа по прекинот на фудбалскиот натпревар меѓу репрезентациите на Србија и Албанија од квалификациите за европското првенство. До прекинот дојде поради тепачка на фудбалерите, откако мал хеликопер (дрон) што бил управуван од далечина го прелета стадионот на „Партизан“ во Белград, виорејќи го албанското знаме и картата на „Голема Албанија“, во која беа вклучени територии од Албанија, Косово, Србија, Црна Гора, Македонија и северниот дел од Грција.

Извор: МИА