ФОТО Бугарскиот „Индијана Џоунс“ ископал вампирски гроб

Во Бугарија е пронајден уште еден гроб во кој е погребана личност за која наводно се верувало дека е вампир, пренесува „Телеграф“.

Овој вампирски гроб го открил професорот и археологот Николаи Овчаров, познат како „бугарскиот Индијана Џоунс“. Овчаров копал под рушевините на Перперикона, древен град кој се наоѓа на југот на денешна Бугарија, во близина на границата на Грција.

Ископувањето на градот за кој се смета дека е стар околу 8.000 години, започнало во 2000 година.

Пред неколку дена археологот објави дека пронашол одлично сочуван скелет на човек со колец во градниот кош, кој живеел во средниот век.

- Ова без сомнеж е уште еден пример за изведен анти-вампирски ритуал - изјавил Овчаров.

Тој објаснил како металниот колец бил прободен во телото за да го спречи „лошиот човек“ да стане од мртвите и да почне да ги напаѓа живите.

- Тоа честопати се правело на луѓето кои починале во неразјаснети околности - како што е самоубиството - изјавил археологот.

Најдениот скелет му припаѓал на човек на возраст помеѓу 40 и 50 години, кој најверојатно живеел во 13 ек.

Освен тоа што скелетот имал тежок колец во градите, на погребаниот човек му била отсечена левата нога под коленото и поставена покрај телото.

Овчаров  и неговиот тим во гробницата пронашле и остатоци од жена и дете, наредени така да наликуваат на приказот на Богородица и малиот Исус.

Археологот изјвавил дека вакво поставување на телото бил еден од начините да се избрка чумата. Овчаров е заслужен за голем број откритија на бугарското тло, и објавил 18 книги и повеќе од 250 прилози. Обичајот да се забива колец во телото на починатиот како „превентива против вампирството“, долго време се задржало во Бугарија. Слични ритуали се спроведувале и во Србија, па телата на оние за кои имало сомнеж дека ќе се повампират, биле прободувани со колец или биле спалувани.

Подготви:Б.В.