Филхармонија в четврток со „Ах тие летни ноќи“

Македонската филхармонија, во четврток во Македонската опера и балет во 20 часот, ќе го одржи вториот симфониски концерт од новата концертна сезона со наслов „Ах тие летни ноќи“.

„Програмата е составена од несекојдневни, интересни дела - „Прошетка до рајската градина“, една од најимпресивните оркестарски композиции на англискиот композитор Фредерик Делиус и циклусот од шест песни „Летни ноќи“ од францускиот композитор Хектор Берлиоз, дела кои ќе ја доживеат премиерната изведба во Македонија, како и епската Четврта симфонија од германскиот композитор Јоханес Брамс. Овој концерт е посебен не само поради впечатливата програма, туку поради извонредните гости“, се наведува во соопштението од Македонската филхармонија.

Диригент е Англичанецот Пол Меккриш, кој се смета за еден од најдобрите познавачи на барокната и ренесансната музика, а македонската публика ќе има ретка можност во живо да ја слушне една од водечките оперски певици во Европа, мецосопранот Ан Халенберг од Шведска. Таа доаѓа од престижните оперски куќи како Миланска „Скала“ или „Реал“ од Мадрид и соработува со реномирани диригентски имиња како Рикардо Мути или Кент Нагано.

Подготви: Ј.А.

Не е дозволено преземање на оваа содржина или на делови од неа без дозвола од редакцијата на Плусинфо