ГАЛЕРИЈА 75,8 проценти од анкетираните Центарци против изградба на десеткатница на Водно

Мнозинството граѓани ја подржуваат иницијативата на градоначалникот Жерновски за распишување на референдум за битните прашања за граѓаните на општина Центар. На прашањето: „Градоначалникот на Центар најави одржување на референдуми за битни прашања и одлуки за општината. Дали сметате дека ова би била добра пракса?“, огромно мнозинство од испитаниците од дури 76,2 проценти смета дека таквата пракса би била добра, 15,2 проценти смета дека тоа не би била добра пракса, додека 8,6 проценти од граѓаните не дале одговор.

68,1 процент од граѓаните се изјасниле дека би гласале против поставување на барокна фасада на ГТЦ, 22,1 процент би гласале за поставување на барокна фасада, 8,8 проценти  уште не знаат како би гласале или одбиле да одоговорат, додека 1 процент рекле дека нема да гласаат на референдумот. Притоа, интересен е фактот дека 37 проценти од оние што се изјасниле дека гласаат за ВМРО-ДПМНЕ се против барокната фасада на ГТЦкоја е проект на ВМРО-ДПМНЕ.

Слична е поддршката за градоначалникот во одлуката да не се гради десеткатницата на Водно која предизвика бурни реакции во јавноста. На прашањето:Дали залагањето на градоначалникот Жерновски да се спречи изградбата на десеткатницата на Водно вие го подржувате или не го подржувате 75,8 проценти од граѓаните се изјасниле дека го подржуваат Жерновски во напорите да се спречи оваа градба, само 11,7 проценти рекле дека не го подржуваат градоначалникот,  односно сметаат дека десеткатницата треба да се гради, додека 3,6 проценти не се запознаени со случајот или не дале одговор. Притоа, интересен е фактот дека дури 53 проценти од оние што се изјасниле дека гласаат за ВМРО-ДПМНЕ се против десеткатницата која е проект на ВМРО-ДПМНЕ, а само 22 проценти од испитаниците се за нејзина изградба.

Истражувањето за потребите на општина Центар било извршено минатиот викенд  на 4 и 5 октомври 14 и го реализирала агенцијата „Рејтинг“ на репрезентативен примерок од 850 испитаници-жители и гласачи на општината. Податоците се собирале по пат на телефонско интервју, а стандардната статистичка грешка во рамките на општиот примерок изнесувала 3,3 проценти.





Не е дозволено преземање на оваа содржина или на делови од неа без дозвола од редакцијата на Плусинфо