Од утре парно, додека е потопло - само наутро и навечер!

Грејната сезона за граѓаните кои се греат на парно официјално треба да започне утре и ќе трае до 15 април идната година. Според правилата на снабдување со топлинска енергија, радијаторите на граѓаните треба да бидат затоплени во периодот од 06 до 21 часот во текот на денот и да се обезбеди температура на греење од 19 до 21 степен Целзиусов.

Трите снабдувачи со топлинска енергија БЕГ, ЕЛЕМ Енергетика и Топлификација Скопје Север велат дека се подготвени да ја почнат сезоната навреме, но ги потсетуваат граѓаните на обврската да ги проверат радијаторите и да ги платат сметките за струја за да можат да се вкличат пумпните станици.

Според правилата за снабдување со топлинска енергија, граѓаните или управителите, односно Заедницата на сопственици, треба да извршат проверка на исправноста на грејните тела и на инсталацијата во зградите во период од 15 мај до 15 септември, за да може да се обезбеди непречена испорака на топлинска енергија во грејниот период. 

Со оглед на високите дневни температури, компаниите снабдувачи со топлинска енергија, најавуваат дека е можно радијаторите да бидат топли замо во утринските и ноќните часови.

Со стартувањето на сезоната, стартува и обврската на граѓаните кои се откажале од парното да го плаќаат надоместокот за ангажирана моќност (фиксен дел) од надоместокот за топлинска енергија, кој се определува согласно тарифниот систем за топлинска енергија и изнесува околу 1.000 денари. 

 Не е дозволено преземање на оваа содржина или на делови од неа без дозвола од редакцијата на Плусинфо