Отворен првиот Дневен центар за деца со оштетен вид од претшколска возраст

Првиот Дневен центар за деца со оштетен вид на предучилишна возраст во Македонија беше пуштен во употреба денеска во кругот на Државното училиште за рехабилитација на деца и млади со оштетен вид „Димитар Влахов“ во Скопје, во рамките на одбележувањето на Меѓународниот ден на белиот стап.

Дневниот центар ќе работи од 8:30 до 16:30 часот и има капацитет за згрижување 15 деца. Тој е комплетна инвестиција на Министерството за труд и социјална политика, во вредност од околу 2,3 милиони денари.

- Дневниот центар ќе даде одлична поддршка на децата до шест години и на семејствата, односно родителите на овие дечиња. Тие тука полесно и побрзо ќе можат да стекнат знаења и вештини за користење на опремата, за ориентација во простор, ќе се работи на нивна рана социјализација, концептуален развој, препознавање на предмети, развој на моторните способности, како и секојдневните вештини. - рече министерот за труд и социјална политика Диме Спасов на отворањето на Центарот.

Најави дека во наредниот период ќе се работи со отворање на најмалку еден дневен центар годишно за ваква намена. Првиот нареден треба да биде отворен во Велес.


Не е дозволено преземање на оваа содржина или на делови од неа без дозвола од редакцијата на Плусинфо