Против секое сало посебен „куршум“

Иако многу нутриционисти тврдат дека тврдокорните масти на телото не можат да се отстранат ниту со урамнотежана исхрана ниту со вежбање, британскиот лекар Макс Томлинсон во својата лондонска клиника за слабеење, овој проблем го решава со оригинален пристап. Таложењето на мастите и појавата на сало на одредени делови на телото зависи од хормоните, а проблемите настануваат кога тие ќе се нарушат. Затоа, во зависност од тоа дали салото се таложи на стомакот, задникот, нозете, грбот или рацете, потребна е соодветно вежбање, промени на животниот стил и начин на исхрана.

Салото на половината кое се прелива од панталоните, а го има и на долниот дел од грбот, може да биде знак за хормонални проблеми со инсулинот, кој го регулира нивото на шеќер во крвта. Исхраната која вклучува слатки го тера телото да лачи повеќе инсулин, а гликозата се таложи во телото, особено  на подрачјето на колковите. За да се смири производството на инсулин, треба да го контролирате нивото на јаглехидрати и шеќер во исхраната. Треба да се избегнува алкохол, бел леб, слатки, чипс, засладени житни снегулки и газирани пијалаци. Најдобар избор се продуктите богати со антиоксиданти како цимет, каранфилче, куркума, чили, брусница, брокула и зелен чај. Рибиното масло, мултивитамините, магнезиумот, цинкот и исхраната богата со влакна ќе го забрзаат губитокот на сало од тие места.

Мастите наталожени во подрачјето на градникот може да биде добар показател за забавено работење на тироидеата. Оваа жлезда ја регулира брзината на телото која ги троши калориите од храната, а одредени производи го влошуваат тој проблем. Тука спаѓаат кељот, зелката, репката, сојата, спанаќот, брокулата и јагодите. Во овој случај е потребно да се интензивира внесувањето на јод и селен во организмот преку лук, кафеав ориз, кромид, туна, ослич, пивски квасец и жито од цело зрно.

Вишокот на женскиот хормон естроген го поттикнува создавањето на маснотии на задникот и нозете. Затоа, јадете повеќе овошје, зеленчук и жито, а намалете го консумирањето алкохол, кофеин (кафе) и таблетите против болки бидејќи го попречуваат црниот дроб при регулирање на нивото на естроген.

Поголемите наслаги на сало на стомакот можат да укажуваат на проблеми со адреналински жлезди кои го произведуваат хормонот кортизол. Долготрајниот стрес предизвикува зголемено ниво на шеќер во крвта, кој пак влијае на растот на нивото на холестерол и таложење на сало на стомакот. Сето заедно доведува до ризик од срцев удар.

Прва важна работа е да се потрудите да го контролирате нивото на шеќер во крвта со исфрлање на калоричните продукти. Друга важна работа е да јадете почесто, редовно и во мали оброци. Пробиотиците ќе ја олеснат варењето, а житото ќе му даде чувство на ситост на телото.

Секс за убави раце. Ако имате маснотии на надлактиците практикувајте повеќе секс, советуваат стручњците. Редовниот сексуален живот му праќа на телото сигнали кои помагаат во регулирањето на тестостеронот, а исто влијание има и вљубеноста. Овие маснотии најчесто се таложат поради опаѓањето на нивото на тестостерон во организмот, што е типично за жените кои влегуваат во менопауза. Зголемете го консумирањето на рибино и ленено масло, како и на авокадо кои се потребни за производство на овој хормон.

Подготви: К. А.