Прва консултација со ортодонт

Првата посета кај ортодонт предвидува клинички преглед на пациентот. На овој начин ортодонтот има увид во состојбата и може да го посоветува пациентот за можните третмани, кога би требало да се започне со третманот, колку би траел и кои се приближните трошоци за него. Доколку пациентот се одлучи да продолжи со третманот, се закажува термин за следна посета, кога се земаат и документираат сите потребни податоци за пациентот.

 

Водење документација

 

Во документацијата на пациентот спаѓаат:

- Отпечатоци од забите, кои служат за да се направи гипсен модел на забите на пациентот.

- Фотографии од забите и лицето на пациентот.

- Рентгенски снимки на забите и вилиците.

Документацијата овозможува прецизна анализа на секој случај (пациент) засебно. На овој начин се документираат и сите случаи на малоклузија кои можат потоа да се искористат за референца во иднина.

 

Планирање на третманот

 

За време на оваа посета, ортодонтот и пациентот го разгледуваат планот за третманите кои се направени со помош на информациите добиени од првата консултација и документацијата. Потоа, се закажува термин за почеток на третманот или, доколку е премногу рано, се закажуваат термини за редовни предгледи на пациентот, додека не дојде вистинскиот момент за почеток на третманот.

 

Вадење заби и други прелиминарни процедури

 

Во одредени случаи, за да се добие доволно простор за порамнување на забите, потребно е да се отстранат одредени заби од вилицата.  Кариесот се отстранува од сите заболени заби пред почетокот на третманот, а понекогаш потребно е и сите заби да се исчистат. Трошоците за горенаведените прелиминарни порцедури не се вклучени во трошоците за ортодонтскиот третман, бидејќи нив ги извршува семејниот стоматолог.

 

Времетраење на третманот

 

Потребни се најчесто 18 - 24 месеци за успешно исполнување на третманот. Во некои случаи овој период е подолг, а во некои, пократок. Времетраењето на третманот зависи од карактеристиките на малоклузијата, видот на третманот и соработката од страна на пациентот.

Пациентите треба да продолжат со редовните стоматолошки прегледи дури и за време на ортодонтскиот третман.

 

 

Доктор Радмила Димовска - Специјалист по ортодонција

КРУНА МС

ГТЦ, КЕЈ 11 НОЕМВРИ 2/2

1000 СКОПЈЕ

+389 2 3166919      

krunams@t-home.mk

 www.krunams.com.mk