СДСМ Крива Паланка: Власта избрка инвеститор и остави 50 луѓе без работа

Наместо да ги привлекува инвеститорите, Општина Крива Паланка експресно ги брка, порача денеска Општинската организација (ОО) на СДСМ во Крива Паланка, обвинувајќи дека според нивните информации, општината не испочитувала договор за Јавно приватно партнерство и намерно го кочела во работата приватниот партнер, поради што 50 вработени се отпуштени од работа.

„Долго најавуваниот проект за изградбата на деловно-административна зграда со површина од околу 1.100 квадратни метри во централното градско подрачје на Крива Паланка, доживеа фијаско на самиот старт. Официјалното отворање на зградата се случи на 25 август, а јавноста нестрпливо ги очекуваше најавуваните нови 50 работни места преку линијата на супермаркети на фирма од Куманово. Само четириесетина дена по свеченото отворање, закупецот на деловните простории, деновиве ги отпушти вработените и почна да ја пакува опремата. Дали вака ВМРО-ДПМНЕ гради партнерски односи со бизнис секторот?“, стои во соопштението од ОО на СДСМ - Крива Паланка.

Партиската организација прашува чии интереси штитат првите луѓе на општината и кој ќе ги плаќа пеналите на приватниот партнер, за кој велат дека инвестирал 550.000 евра.

„Каква порака испраќа ВМРО-ДПМНЕ до следните инвеститори кои евентуално би ја посетиле општината? Чии интереси штитат првите луѓе на општината, своите лични или општите интереси на локалната заедница? Кој ќе ги плаќа трошоците и пеналите на приватниот партнер поради неработењето во следниот период, а со тоа и не неможноста да си ја поврати инвестицијата од околу 550.000 илјади евра? Чија е вината што бројка на невработени во општината е за 50 лица поголема?“, прашува ОО на СДСМ во Крива Паланка.

Потсетуваат на друг сличен случај и прашуваат дали кампањата на Груевски и ВМРО- ДПМНЕ „Инвестирајте во Македонија“ всушност треба да се вика „Избркај ги инвеститорите“.

„Oва не е прв ваков случај, бидејки пред неколку години чевларски погон кој имаше над 300 вработени мораше да се пресели во Скопје. Во најава е дека уште еден чевларски погон  наскоро планира својата инвестиција да ја премести во Врање, соседна Србија. Го прашуваме премиерот Груевски и ВМРО-ДПМНЕ, дали суштината на кампањата „Инвестирајте во Македонија“ е „Избркај ги инвеститорите“?, се вели во соопштението од ОО на СДСМ - Крива Паланка..        


Не е дозволено преземање на оваа содржина или на делови од неа без дозвола од редакцијата на Плусинфо