Тасева: Корупцијата станува култура на однесување во Македонија

Претседателката на Транспаренси интернешенал - Македонија, Слаѓана Тасева, се согласува со американскиот амбасадор Пол Волерс, дека не е смешно, туку е тажно тоа што во Македонија во 2013 година, ниту едно лице не е осудено за корупција.

- Навистина е многу жално што немаме ниту една осуда за корупција, зашто ние имаме сериозен проблем со корупцијата, што е нотирано во сите меѓународни извештаи и никој тоа не го негира. Сите велиме дека имаме проблем со корупцијата. Нека е и 7 проценти бројот на граѓани кои кажале дека имале лично искуство со корупција, од 1.000 испитаници. И во таков случај, ние би требало да имаме барем 7 осудени лица за таква работа. Не треба да го занемаруваме проблемот и да ја криеме неефикасноста на институциите кои не работат на ефикасна борба, а таа се мери преку бројот на осудени лица. Нема ниту санкции за несразмерно богатење ниту за непријавување на имотни состојби, ниту конфискација на имот. Ние имаме нула ефикасност во борбата со корупцијата и затоа проблемот ни се зголемува, бидејќи луѓето се обесхрабруваат да пријавуваат и корупцијата станува култура на однесување во Македонија - вели Тасева. 

Таа додава дека Антикорупциската комисија има мандат да ги следи оние што се на власт и тоа треба да им е приоритет, а тие се занимаваат со поранешните функционери. 

- Не се занимаваат со она што ни се случува со „Скопје 2014“, со трите милиони за изборна кампања, со поткупот на гласачи. Тоа го прават зашто сакаат да си ги сочуваат столчињата а да земаат плати и да не работат ништо, зашто власта може да ги разреши, што е жално, зашто не покажуваат интегритет - додава таа. 

Во „Транспаренси интернешенал“ за 2 години пристигнале повеќе од 1.300 пријави од граѓани за корупција.

Не е дозволено преземање на оваа содржина или на делови од неа без дозвола од редакцијата на Плусинфо