ВИДЕО Скопски џез фестивал со 12 концерти годинава

И оваа година скопјани ќе уживаат во светскиот џез на Скопскиот џез фестивал што ќе се одржи од 16 до 19 октомври на повеќе локации во Скопје, и тоа во Универзална сала, Сити хол центар, МКЦ - Кино Фросина и Македонска опера и балет.

Новина во организацијата е Богдан Бенигар од Словенија кој е програмски директор на Скопскиот џез фестивал. Него денеска на прес конференција го претстави директорот на Скопскиот џез фестивал, Оливер Белопета.

Бенигар, кој е долгогодишен директор на Љубљанскиот џез фестивал, донесува неколку новини во програмата, како концертот во 13 часот на Нед Ротенберг и Саинко Намчилак. Досега на програмата на СЏФ немало концерт во попладневните часови, а програмскиот директор тоа го објаснува како време кое одлично се вклопува во шемата на скопскиот живот во недела.

Постерот и каталогот за овогодинешниот фестивал го изработи словенскиот уметник Карло Меѓугорац.

- Во претходните години беше практика да се земаат графички решенија за постерот од македонски автори, но оваа година, од сите решенија кои пристигнаа немаше ниту едно кое беше барем близу до стандардите поставени претходните години. Затоа се одлучивме за Меѓугорац – рече директорот Белопета.

Цените на билетите ќе се движат од 300 до 1.000 денари, а комплет билети за сите вечери ќе чини 2.600 денари.

Целосната програма на фестивалот можете да ја видите тука. 

Не е дозволено преземање на оваа содржина или на делови од неа без дозвола од редакцијата на Плусинфо