ВМРО-ДПМНЕ: Рената Тренеска - Дескоска не го прочитала мислењето на Венецијанската комисија

Жалиме што токму Рената Тренеска Дескоска денес покажа непознавање на материјата и политизација. Очигледно таа не успеала воопшто да го погледне мислењето на Венецијанската комисија, бидејќи ако го прочитала сигурни сме дека немаше да си дозволи толку многу да го извртува и да ја лаже јавноста, порача ВМРО-ДПМНЕ во реакција на прес-конференцијата на Тренеска - Дескоска.

„Уставните измени се во процедура во која се анализираат сите експертски ставови изнесени во јавната расправа и укажувањата на меѓународните институции, а ќе биде постапено во согласност со највисоките интересите на граѓаните и државата. Постапката за измените на Уставот се водат целосно транспаретно, а во јавната расправа која се води се вклучени чинители од граѓанскиот сектор, надлежни институции и организации, експерти и универзитетски професори. Сите конструктивни сугестии помагаат во овој процес“, порачува ВМРО-ДПМНЕ.

Владејачката партија тврди дека Владата не сака да направи оф-шор зона за перење пари.

„Се што Владата има намера да направи е да создаде услови за формирање на силен финансиски центар, по примерот на Лондон и Луксембург, кој ќе работи врз основа на највисоките меѓународни стандарди од областа на финансиското право и ратификуваните меѓународните договори за борба против корупцијата, перењето на пари и финансирањето на тероризам“, вели ВМРО-ДПМНЕ.

Не е дозволено преземање на оваа содржина или на делови од неа без дозвола од редакцијата на Плусинфо