Балкански дронови

Славеничката еуфорија во Тирана, Приштина, Тетово и во другите албански градови, после инцидентот на стадионот на Партизан во Белград, кога албанско знаме носено на беспилотно летало направи вистински хаос, ќе стивне. Ќе се заборават и неодговорниот триумфализам на албанскиот премиер Еди Рама и паниката во Белград, каде утре треба да допатува рускиот претседател Путин. Зад овој настан, сепак, ќе остане едно сериозно прашање – што сè може да се направи со едно вакво чудо на модерната технологија?

До неодамна, за дроновите мислевме дека се бескрајно скапи беспилотни летала, со кои располагаат само големите сили и ги користат за супертајни снимања и убивање на терористи. Потоа прочитавме дека мали и евтини дронови се користат за сигурносно набљудување и за аматерско снимање од височина. Сега, од технолошки најнапредните воини на Балканот, Албанците, кои во периодот 1999-2001 година „војуваа“ многу повеќе со подарените сателитски телефони одошто со калашникови, научивме дека со една таква играчка, која чини не повеќе од 600 евра (конкретниот модел), мотивиран и фанатизиран човек може голема беља да направи и преку ноќ да го запали ионака лесно запаливиот Балкан. Нема да биде чудо ако следната војна на Балканот биде војна на дронови – малото летало управувано со далечински управувач вчера носеше знаме, но утре може да носи и бомби.

Можностите за (зло)употреба на овие летала и во мирнодопски услови се бескрајни. Треба да само да се има само многу фантазија и малку пари. Дроновите и сега можат легално и лесно да се набават на интернет, а не е далеку денот кога секој ќе може да си купи ваква играчка на Бит пазар. Им предлагам на другарите од Бихаќка веднаш да си набават неколку вакви летала. Нека ги вклучат малку текнувалата, за да им текне како да ги користат. Еве им само една бесплатна идеја за евтин, но ефикасен перформанс – едно такво летало може да понесе црвена боја што ќе се истури врз главата на Ќосето пред Судска палата, на пример. Во секој случај, многу попаметно е некој денар да се потроши за тоа, одошто да се плаќаат оние дронови на социјалните мрежи, кои ионака не вршат никаква паметна работа, освен што прават непотребни кавги.

Слушам дека во Скопје веќе има дронови со кои се вршат фотографски снимања. Предлагам ЗНМ да ги пронајде и да ги ангажира на 24 октомври да летаат транспарент со напис „Слобода за Кежо“, пред прозорците на салата во која скопскиот Апелациски суд ќе решава дали да го фрли нашиот колега во зандана или да го ослободи.