Премиеру, не Ви е срам да се фалите?

 Не, господине Никола Груевски, акцијата „Детонатор“ не е „потврда за силната посветеност на Владата во борбата против организираниот криминал и корупцијата на неселективна основа“. Не, премиеру, таа сепак не покажува дека го остварувате она што го ветивте на изборите во 2006 година. И не, Пастиру наш, не е вистина дека „не може некој да очекува оти ако е близок на некого, или на некоја политичка партија или поединец, дека ќе биде заштитен доколку прави криминал, корупција и за тоа се обезбедат докази“.

Кого фолирате Вие?

Акцијата „Детонатор“ покажа дека цела источна Македонија е под рекет и терор. Да бевте посветени на борбата против криминалот - 10 отсто од она што ветивте! - тоа немаше да се случи. Колку што ме држи сеќавањето, Вие во 2006 година не им ветивте на граѓаните дека ќе бидат тероризирани од бандити, а овие дека ќе бидат заштитени од полицајци и од судии. А тоа, имено, Ви се случи пред носот. И тоа не во некоја недопирлива енклава во западна Македонија (па некако човек да ве сфати, но не и да ве оправда), туку во царството на вмровштината, во Кочани, Штип, Крива Паланка... Резил невиден!

Премиеру наш, велите, независно дали е организиран или не, криминалот е криминал. Е, не ќе да е баш така. Криминалот е организиран, кога е поврзан со власта. Тогаш велиме дека тоа е мафија. А овој криминал, не само што е поврзан со власта, со Вашата власт, со Вашите „горди послушници“ и избрани кадри на теренот, туку мафијата очигледно Ви се оттргнала од контролата и се заканува да завладее со институциите на власта.

Така како што Црвенковски своевремено им се закануваше на мафијашите, велејќи дека ни „свети СДСМ“ нема да ги спаси, така Вие, преподобен наш премиеру, велите: „Кај нас нема пардон, кој ќе се фати тој ќе плати, независно кој стои зад него, кој чив роднина е, кој е каде присутен, вработен, назначен, избран или слично“. Бре, бре, бре... Мислите дека некој Ви верува? Бандитите кои ги штити Вашата партија не веруваат, а камоли обичните луѓе! Не му веруваа и на Бранко кога му се силеше на октоподот. Потоа тој ја плати казната. Кога ќе ја платите Вие?

Она по што оваа влада се разликува од претходните, премиеру Груевски, не е наводната неселективна примена на правото и правдата, туку стравичната криминализација на Вашиот систем на владеење. Значаен дел од милионите евра потрошени за поекти за производство на „лажна среќа“, завршуваат во приватни џебови. Нема кој тоа не го знае. И нормално, кога тоа го гледаат локалните рекетарски банди, тие си го бараат своето. Особено во оној дел од Македонија, каде што луѓето со сила Ви ги донесоа гласовите на тацна, за Вие сега да ги трошите парите на тие сиромашни луѓе за китење на метрпополата со мермер и со бронза.

Што сега им остана на тие луѓе? Да се коцкаат во кафулињата на автомати? Или да се забавуваат со досиејата што ќе ги фабрикува Вашата тајна полиција, а Вие ќе ги објавувате на интернет? „Неселективно“, разбира се! Навистина, кого фолирате Вие?

Мил наш премиеру, повеќе од 600 автомати за комар, апарати за производство на лажна надеж, Вашата полиција открила во само три града во Македонија. Кажете им на полицајците да не ги носат во Ѓорче Петров, за министерката Јанкуловска да се слика како со трофеи, туку да Ви ги истоварат дома, пред зграда, за секој ден да Ве потсетуваат колку навистина го „усреќивте“ овој напатен и исплашен народ.

Тој од Вас чека извинување, а не фодули!

Бранко Героски