Рембрант „класичар“

1.

Не знам до кога ќе издржам да се бавам со нашиот неодминлив Рембрант од десниот сокак, ама човеков настојчиво дава материјал „за дискусија“. Се разбира – првоодделенска, ама тоа е нивото и сознанијата. Нејсе!

2.

Сега нашиов класичен Рембрант се зафатил со „класични студии“ и ни го објаснува минатото и сегашноста, светот и историјата низ неговата „високоумна“ призма – главно а ла Аце Македонски! Па така, овој наш страствен „филозоф“, наместо да слика – што му е основна и единствена професија – намислил да ни држи првоодделенски предавања, иако без трошка стручност и познавања во областите за кои пишува.

И нормално, сѐ почнува од Аце Македонски (овој изгледа и легнува и станува со него), како најзначајна европска (море светска!) историска личност, а неговите освојувачки походи ни ги претставува, ни мање ни више (омилениот јазик на Рембрант), туку како европеизација на светот (sic!). Аман бе, та зарем толку сме биле неуки и неинформирани, па разурнувачките походи на нашиов ти Аце (и Рембрант сосе него) да не сме ги гледале како европска цивилизациска придобивка? Што ли школи сме учеле и кај какви ли ти неписмени професори?

3.

И ова негово „влијание“ да ти било основа за понатамошниот моќен Рим (ама паралела, Аце и Рим!), сѐ до денес кога „светот е наполно европеизиран“ (немој бе!), па дури и САД! Можеби нашиов Ацо Рембрант во своите небулозни соништа се идентификувал со имењакот Аце Велики (Македонски), ама до толку? И не само САД, туку и Индија и Кина, па Австралија, за Русија да не правиме муабет, и оди, оди … сме стигнале дури до Месечината и Марс. Пази, ни мање ни више, сме ги европеизирале и нив!!! Мореееее, умна глава! Ама, претпоставувам, овие сегашниве европејци, оние во т.н. к…. Вавилонска, тоа не ни го признаваат и не нѐ примаат во ЕУ.

И, што е најинтересно, голем дел од оваа „мудрост“ на нашиов Рембрант му била кажана во Франкфурт, од некој идиот – (квази)јогин, кој ги терал во мајчина Ганди и компанија што ги избркале Англичаните ид Индија. Е сега, нашава умна глава не нашол таков идиот од Кина и Австралија, од Месечината и Марс да му ја потврдат тезата, ама јогин си е јогин, доволен е да покрие сѐ.

4.

Па добро, хартија навистина трпи сѐ, ама нашиов лумпен-јогин учел ли некакво школо, спиел ли на часови, што правел? Па можно ли е на едно место, во триесетина реда да се изнапишат такви будалаштини? Ајде за Аце Македонски, како најлукративна тема денес и негов идол (до некоја следна прилика), ама да се напише дека САД се европеизирани, па Индија, па Кина …?!?   А Русите и Американците да ти биле само проследувачи на европската култура! Па човеков свесен ли е што говори? И сето тоа заради некој идиот од Индија? И заради „величественоста“ на походите на Ацета наш, за чија големина сведочеле, ни мање ни више, 200-300 Хунзи??? И неколку Калаши. Аман бре човече, можно ли е?

Да се понижуват, да се омаловажуват, да се плука по такви цивилизации како средноисточните (Иран, Ирак), далекуисточните (Индија, Кина), да се „интегрират“ во некаква европеизација којашто не постои, да не се знае историјата и суштината на САД и Русија, и сѐ тоа само да се потврди некаква сулуда теза за Александар Македонски, не е само незнаење и недостаток на сиви ќелии, не е само глупост и бегање од часови тогаш кога требало внимателно да се слуша. Тоа, да простите, се граничи со патологија и со разни болести што можат да се најдат во секоја медицинска енциклопедија.

/Преземено од блогот на авторот www.teodosievski.blog.mk. Поднасловот е редакциски./