Власта - брод кој тоне

Пред некој ден разговарав со еден странски дипломат. Мислам се шпиониравме меѓу себе - како што милува да каже власта. Значи зборевме шпиунски за шпионската афера. За почеток како релаксација му прераскажував што напишал српскиот портал Њус.нет за нашата шпионска афера. Порталот дознал од сигурни извори дека конечно е продадена големата вековна тајна на Македонија, а тоа е како се правело тавче гравче. Тоа е сериозна закана за националната безбедност на државата. Мојот соговорник, не само што веднаш се изрелаксирал, туку се смеел до солзи. Додадов дека можно е ,,шпионите“ да го продале и рецептот за ајвар, а тоа ќе беше катастрофа за националната безбедност.

Конечно почнавме сериозен разговор. Заедничка констатација беше дека наспроти законските норми за ниво на тајност на одделни документи, реално во тие исправи и нема баш нешто важно што некого го интересира. Оти немаме ништо посебно за што некој би дал пари за да дознае. И така тука за се се знае. Дури и тие содржини што ги пренесоа властите дека биле објект на шпионирање секој просечен бербер ги знае. Му кажував дека според сите индикации, ефективна тајност кај нас има само во организиараниот криминал кој е во мегало-размери. Но, тој тука изреагира поинаку, дека токму во оваа сфера се се знае. Се знае за лажните внатрешни и меѓународни инвестиции со кои се перат пари, се знае за тендерите, за уцените, за рекетите, зо корупциите и за процентите. А добро се познати и актерите. Голема можност е бројни странски ,,инвеститори,, од Моше Баум до најновиот Субрата Рој и сличните на нив да служеле само како магла. На пример, на овој последниот ниту една банка на светот не му давала кредит освен нашите банки !!! Ептен интересно!

Власта вели дека „шпионите“ ја загрозувале националната безбедност. Дури атентат спремале против премиерот. Абе луѓе да е за атентат, тие воопшто не треба да се плашат од некакви вештачко создадени шпиони, особено ако се нивни. Туку сериозно треба да се плашат од тие што им гио уриваат бизнисите. Од тие што им ги уништија животите. Од тие што им ги растуриле семејствата. Од тие што ги доведоа до просјачки стап. Од тие што ги измамија. Подобро речено од секој обичен човек. Оти бројката на тие на кои што оваа власт им создаде несреќа опасно се наближува до севкупната бројка на населението. Националната безбедност е загрозена токму од ваквата власт и нејзините пипала.

Токму од тие што ги уривале институциите. Од тие што го уништиле судството. Од тие што создадоа пирамидална администрација. Од тие што газат по основните демократски принципи. Од тие што единствениот талент им е организираниот криминал. Од тие кои работат мислејќи дека ќе умрат утре а крадат мислајќи дека ќе живеат илјадници години. Од тие што имаат празна душа, празно знаење, празен морал, ама полни сметки. Уништиле се живо и сега како избезумени трчаат по мдиуми со дисквалификации. Трчат да сечат ленти таму кај што други граделе. На помислата дека си ја губат власта си го загубија умот и разумот. Кампања против шефот на опозицијата за тендери од неколку илјада евра, кои патем ги искажуваат во денарски цифри за да не се срамат од сумата, а самите искркаа астрономски три милјарди евра. Ваков грабеж се нема случено ни во Колумбија, ни во Тајланд ни во Гватемала. Целта е да се влече равенка во лошото. Но, да ги споредите Заев и Груевски е исто како да ги споредите среќата и несреќата. Човекот одбива дуели што во секоја демократска држава е основна обврска пред јавноста. Но, очигледно се сомнева во тоа што го фали. Власта сега апси и свои луѓе, оти сега се соочува со побуна во своите редови. На луѓето не им е јасно како човекот кој не сакаше да смени ни буква од името, сега ги моли Грците за компромис. Дури ги напаѓа нервозно оти не прифаќаат никаков компромис. Од друга страна за да покрие некоја дупка во патот без пат, морал да чепка и по кабинетот на Велјановски. За секој случај подобро човекот да замине како шеф на шпионот отколку како одговорен за 24 декември.

Историската власт не доведе до историска катастрофа. Сега сме на врвот на светската листа поа сиромаштијата. А пред осум години бевме лидери во регионот по интеграцијата и демократскиот капаците. Сега требаше да бидеме полноправна членка не само на НАТО, туку и на ЕУ, оти бевме пред Хрватска. Но, дојде еден циркузант и го фатил лавот за опашка. Сега со неговата антика, по живеачката сме се поблиску до антиката. Лидерот проблемот со името го воздигна до ниво на живот или смрт. Се повеќе ни се случува ова второто? А целта беше сосема друга. Да се маскира вековниот грабеж, оти занесените луѓе со умот летаат високо и не гледат што се случува во земјата или во подземјето.

Провладините медиуми продолжуваат да бидат полни со конструкции, инсинуации и дисквалификации за опозицијата. Ако сака опозицијата да дознае како ја замислува црниот ѓавол нека погледне кај бројните провладини телевизии. Таму ќе дознае за многу работи кои ги нема видено ниту во најстрашниот хорор кошмар. Таму вистината може да биде присутна само по некоја случајна грешка или пак ако им се случи јавно искажаниот збор да бил побрз од нивната злонамерност. Бомбастични наслови полни со фолклорен сензационализам и блесав футуризам. Треба ли некој да им укаже на сопствениците на медиумите дека е крајно време барем делумно да си го спасат образот. Врвот на криминалот наскоро ќе падне, а тие веќе сериозно треба да се подзамислат што ќе се случи со нив како помошни актери па и соучесници на ваквиот криминален режим. Најблаго речено, ќе висат на столбот на срамот. А башка законот. Не би сакал да сум во нивна кожа со толкав валкавост. Да се малку паметни под хитно ќе се симнат од бродот кој сигурно веќе почна да тоне. Тоа ќе биде крај на еден режим кој ќе остане мемориран како општа темнина и елементарна катастрофа, на кој за жал за да дојде на власт му помогнале и бројни опозициони структури. Поради дворски игри.

Не е дозволено преземање на оваа содржина или на делови од неа без дозвола од редакцијата на Плусинфо