Фејсбук+IBM+Интел = Alibaba.com

Вредноста на кинескиот е-комерцијален гигант Алибаба од претходната недела достигна неверојатни 139 милијарди евра што е повеќе од вредноста на Амазон, Фејсбук, IBM и Интел заедно.

Компанијата, откако претходниот петок почна јавно да тргува на њујоршката берза, доживеа пораст на нејзините акции за 1/3 од нивната почетна цена со што ја надмина вредноста на неколкуте северноамерикански гиганти.

Алибаба нема измислено никаква нова и револуционерна технологија, ниту пак го креираа смартфонот или го кодираа пребарувачот на Гугл. Не направија ниту најдобар оперативен систем или пак имаат нешто со почетокот на онлајн продавниците. Но во светот на технологиите, иновациите не се случуваат само кај програмерите и развивачи на софтвери и апликации. Иновациите исто така се случуваат и кога сите тие технологии ќе ги споите во едно и ќе ги понудите на користење на што е можно поголем број луѓе.

Алибаба нема намера да застане тука, туку ќе продолжи да се развива бидејќи успехот на компанијата зависи исклучиво, од како што вели сопственикот и основач Џек Ма, нивната флексибилност и истрајност  во работата и секако среќата да се биде во центарот на најголемиот пазар во светот како кинескиот, кој што брои потенцијални 1,3 милијарди потрошувачи. 

- Кога имате 1 милион долари, тогаш можете да се сметате за среќен човек. Кога од тие 1 милион долари ќе направите 10 милиони тогаш веќе ви почнуваат проблемите. Но кога ќе имате 1 милијарда долари и повеќе тогаш веќе морате да почнете да бидете најодговорен што некогаш сте биле во животот – рече Џек Ма, на финансискиот форум во Њујорк, организиран од групата „Clinton Global Initiative“.

Алибаба стана мајстор за кинеската економија и никој не може веќе да каже дека со нивните 14 таканаречени експозитури кои се дел од Алибаба Групацијата, нема да го освои целиот свет како лидер во онлајн трговијата. Една експозитура која што е добро позната кај нас е секако „АлиЕкспрес“ (aliexpress.com), веб продавница која што по многу поволни цени врши испорака на целокупната понуда во Македонија.

Во многу области како телефонијата и пребарувачите во кои што гиганти како Гугл, Микрософт и Епл не успеаја на кинескиот пазар или се уште се обидуваат да го најдат клучот до пазарот со една милијарда потенцијални потрошувачи, Алибаба бележи незапирлив раст со своите ограноци. Секако, тука не смее да се заборави и поддршката која што ја добива Алибаба од кинеската влада со поедноставување на комплицираните административни процедури за своите фирми, со што Алибаба добива огромна предност за разлика од странците. Затоа, сите светски фирми кои што сакаат онлајн да работат со кинескиот пазар, прво се обраќаат до Алибаба групацијата, бидејќи знаат дека ќе заштедат многу пари ако ги прескокнат неколкуте административни пречки за онлајн бизнис кои што ги имаат странските фирми што се обидуваат да се наметнат како бизнис фактор во Кина.

Алибаба во овој момент има регистирано 302 милиони корисници на своите онлајн сервиси, што е на пример многу близу до вкупната бројка на население во САД, но само еден минијатурен дел од потенцијалниот кинески пазар.

Единствените технологиски и дигитални компании во светот кои вредат повеќе од кинеската Алибаба се добропознатите американски перјаници како Епл со вредност од 373 милијарди евра, Гугл кој што тежи 245 милијарди евра и Микрософт со вредност од 237 милијарди евра.

Подготви: В.С.
Не е дозволено преземање на оваа содржина или на делови од неа без дозвола од редакцијата на Плусинфо