ГАЛЕРИЈА Слепите ѝ порачаа на власта: Немојте за нас, без нас!

Министерството за труд и социјална политика и Владата да не донесуваат одлуки и проекти за нас, без наша консултација. Не смее да се заборави дека ние сме лица со најтежок вид инвалидитет, апелираше денеска  Жарко Селковски, претседател на Националниот сојуз на слепи на Република Македонија (НССРМ), на прес конференација по повод 15 октомври, меѓународниот Ден на белиот стап. 

„Ние сме тука меѓу вас, не замижувајте“ порачаа денеска слепите лица до владата и ги истакнаа проблемите со кои се соочуваат во нивното секојдневие.  

Селковски апелираше до сите учесници во сообраќајот да имаат почит и трпение кон слепите лица и со допир и говор да им помогнат при поминувањето на семафори и качување во градскиот превоз. Сојузот апелира и бара ветување од властите дека ќе се залагаат за укинување на сите облици на дискриминација кон слепите лица во сите општествени сфери на животот. Се бара достапност на физичкото опкружување и приспособеност на јавниот превоз за слепи лица со звучна најава на бројот на автобусот при пристигање на станица, бидејќи, како што велат, во новите автобуси на ЈСП веќе има таква опрема која тоа го овозможува.

Читањето е исто така проблем за слепите бидејќи во Македонија, во повеќе од 90 отсто од објавените и публикувани материјали не се достапни за слепите лица. Затоа, според НССРМ, истите треба да бидат 
изработени во формати како книги изработени во Брајова (релјефна) азбука – техника или пак во звучна форма затоа што секој има право да чита.
Слепите инсистираат да се остранат и новите дискриминаторски одредби во Законот за социјална заштита (Сл. Весник бр.116 0д 4.08.2014) во однос на правото на помош и нега од друго лице и правото за 
додаток на слепило. Исто така се надеваат дека во скоро време ќе се подготви и предлог закон за самостојно движење на слепи лица со куче-водич, кој покрај белиот стап би овозможил олеснето движење на слепите лица.

- Белиот стап, како симбол на слепите е едно од најважните помагала во нашите животи. Од движење по улица, до извршување на секојдневните обврски и ориентација во просторот, стапот е најкористената алатка во животот на слепиот човек– рече Селковски како претставник на повеќе од 2.500 слепи лица од целата земја.

Беше промовирана и аудио книга од авторката Ксенија Николова, која самоиницијативно ја издала оваа творба.

- Пред три месеци, мојата книга „Идиотски приказни“ се појави како прва аудио верзија која што е направена на македонски јазик. Ги поттикнувам сите мои колеги-автори да издаваат аудио верзии од 
своите книги и да ги приближат своите текстови до слепите луѓе – апелираше Николова.

Во фоајето на „Даре Џамбаз“ беше организирана и изложба на ракотворби, облека и друштвени игри изработени од слепите лица.

Под мотото „Слепилото е состојба, а не болест“ се организираше и крводарителска акција во истите просториии на Црвениот крст, каде слепите лица, после задолжителниот лекарски преглед, можеа да 
покажат солидарност и желба за помош на сите луѓе на кои им е потребна крв.

- Неколку пати се обидував во минатото да бидам крводарител, но поради болест не успевав во тоа. Ова е еден од најсреќните моменти во мојот живот, бидејќи конечно можам да дадам крв на сите оние на кои им 
е потребна – рече Елица Андоновска, 57-годишно слепо лице од Скопје.

Националниот сојуз на слепите на република Македонија е формиран во 1946 година.

Не е дозволено преземање на оваа содржина или на делови од неа без дозвола од редакцијата на Плусинфо