За празниците сѐ нека биде умерено

Калоричната и солена храна, како и алкохолот се неизоставен дел од новогодишните и Божиќните празници. Мрсната храна може да има несакани ефекти на функцијата на ендотелот на крвните садови, зголемувајќи го нивото на холестерол во крвта. Вишокот внес на алкохол може да го зголеми крвниот притисок или да предизвика неправилна работа на срцето. Во тек на празниците не е исклучен ниту емоционалниот стрес. Студеното време од своја страна води до зголемен отпор во крвните садови, спазам на артериите во срцето (коронарните артерии), згуснување на крвта и формирање тромби. Сами или во комбинација, овие фактори можат да доведат до појава на кардиоваскуларни случувања, како што се срцев удар, мозочен удар, зголемување на крвниот притисок и компликации од него.
Со мали прилагодувања на традиционалното прославување на Нова година и Божиќ можете да уживате во празничното расположение притоа незагрозувајќи го своето здравје. За таа цел сакаме да Ве посоветуваме како безбедно и задоволно да ги поминете претстојните празници.

Неколку корисни совети

- Избегнувајте ги сите поттикнувачки фактори за кардиоваскуларни случувања: тешка физичка работа, прејадување, психички стресови, вишок солена храна, прекумерна консумација на алкохол.

- Редовно земајте ги препишаните лекови.

- Не го одложувајте прегледот кај кардиологот штом почувствувате градна болка, гушење, зголемување на крвниот притисок или други тегоби.

- Исхраната во текот на празниците треба да биде количински умерена. Консумација на печено црвено месо (на пр. јагнешко, свинско) е дозволена, но во количина до 100 грама дневно (парче големо како половина дланка). Препорачуваме избегнување на пржена и мрсна храна. Месото комбинирајте го со свежа зелена салата.

- Течности: Пијте вода или чаеви со малку шеќер или без шеќер. Вкупната дневна консумација на течности (вода, чај, сок, супа, алкохол, млеко) треба да биде 1,5-2 литра, доколку не Ви е препорачано поинаку. Алкохол: Црвеното вино е богато со антиоксиданси, кои го штитат срцето. Дозволена е консумација на 2 дл црвено вино за мажите и 1 дл за жените. Консумација на друг алкохол е дозволена, но исто така во минимална количина (на пр. една чашка ракија). Сокови: Избегнувајте да пиете газирани пијалаци (кока-кола, фанта и сл.), како и обоени овошни сокови. Се препорачува консумација на свежо приготвен домашен сок. Кафе: Дозволена е консумација на 1-2 кафиња дневно.  

- Десерти: Тортите, колачите и чоколадите се неизоставен дел од новогодишните празници. Доколку уживате да јадете слатки производи можете да си дозволите, но само едно!

- Секојдневни прошетки се неопходни за одржување на кардиоваскуларниот систем. Препорачуваме прошетки во природа кога не е многу студено времето (на пр. во попладневните часови).

Ви посакуваме среќни и весели новогодишни и Божиќни празници, многу здравје и среќа во следната 2012 година.

Тимот на „Филип Втори“