Безболни ласерски зафати на мекото ткиво

Позната е изреката дека убавиот збор отвора железни врати. Но, слободно истото можеме да го кажеме и за убавата, блескава насмевка. Покрај редовната и темелна орална хигиена, потребно е да се прават и редовни посети кај стоматолог. Понекогаш, за жал, се појавуваат непредвидени ситуации во кои треба да се интервенира на поинаков начин, а сето тоа е од исклучителна важност за здравјето на вашите заби и усната празнина.Одредени  стоматолошки процедури подразбираат хируршки зафат на меките ткива во устата (најчесто непцата). Во овие зафати спаѓаат: ремоделирање на непцето (гингивопластика), отстранување на непцето (гингивектомија) и отстранување на ткивото што ги поврзува усната, непцето и/или јазикот со долниот дел од усната празнина (френектомија). 

Гингивопластика - ремоделирање на непцето

 Кај некои луѓе непцето не расте на соодветното место, особено доколку трајните заби не растат плански. Во овие случаи непцата понекогаш растат до тој степен што ја покриваат целата горна третина од забите. На овој начин, при насмевнувањето најмногу до израз доаѓаат непцата, а помалку забите. Корекцијата е една од наједноставните процедури во естетската стоматологија. Притоа се применува следнава процедура: забите и непцата се анестезираат со локален анестетик, а потоа ги ремоделираме непцата и на тој начин се издолжува појавата на забите. 

Гингивектомија 

Здравите непца се важен дел од личната појава. Но, понекогаш непцата растат по површината на забот, при што насмевката се нагрдува и луѓето често се срамат, а поради тоа страда и самодовербата. Гингивектомијата е хируршка процедура со која се отстранува мал дел од непцето околу забот или забите. Најчесто се користи за ремоделирање на непцата и добивање на поубава насмевка, но има своја примена и во случаи кога треба да се отстрани заболен заб или да се постави пломба. И гингивектомијата е релативно едноставна хируршка процедура. Правиме мал засек, а потоа го отстрануваме вишокот на ткиво со посебен инструмент. 

Френектомија

Френулум е ткивото кое ги поврзува подвижната усна или образот со непцето. Во некои случаи, доаѓа до попречување на нормалното подредување на забите или да повлекување на непцето. Хируршкиот зафат кој што е решение за овој проблем се нарекува френектомија. Доколку не се лекува, состојбата може да резултира со повлекување на непцата. Кај одредени пациенти френектомијата се извршува заради затворање на празнината (дијастемата) меѓу предните заби. Лингвалната френектомија подразбира отстранување на френулумот под јазикот. Овој третман најчесто се препорачува за пациентите кои имаат краток и затегнат френулум, поради што тешко изговараат одредени звуци и букви. 

Традиционални третмани

Традиционалните третмани за овие состојби подразбираат мали хируршки зафати за да се отстрани непотребното ткиво. Зафатот се врши со скалпел и локална анестезија, при што доаѓа до крвавење, за чие целосно заздравување се потребни две недели. 

Ласерски третман

Ласерскиот третман ја елиминира потребата од зашивање и употреба на скалпел. Бидејќи ласерот го подгорува ткивото, процедурата е безболна и нема крвавење. Како и третманот, така и периодот на заздравување е многу пократок. 

Доктор Радмила Димовска - Специјалист по ортодонција

КРУНА МС

ГТЦ, КЕЈ 11 НОЕМВРИ 2/2

1000 СКОПЈЕ

+389 2 3166919      

krunams@t-home.mk

 www.krunams.com.mk